Vedteke av landsmøtet i Sogndal 21. - 23. april 2023.
INNLEIING
Norsk Målungdom (NMU) skal nytte dette programmet som grunnlag i arbeidet for nynorsk, dialekt og språkmangfald. Organisasjonen skal arbeide politisk og vera med på å utforme den norske språkpolitikken. Organisatorisk skal me arbeide for å verte større og sterkare.
1 POLITISKE PRIORITERINGAR
NMU skal prioritere dei følgjande sakene i den komande perioden. Me skal òg markere standpunkt i og arbeida med andre språkpolitiske saker som vert aktuelle.
1.1. Språk i høgare utdanning
Høgare utdanning er ein viktig arena for å styrkje språket vårt, men er spesielt utsett for domenetap til engelsk. Det akademiske språket i Noreg er i stor grad etablert som bokmål, og det er ein stor mangel på akademisk språk på nynorsk. Universitets- og høgskulesektoren har ei lovfest plikt til å ta vare på og utvikle norsk fagspråk.
NMU skal jobbe for:
- at denne plikta vert følgd opp
- at nynorsk skal vera tilgjengeleg for alle som vil nytte det i akademia
- at brot på kravet om 25 prosent bruk av båe skriftspråka i universitets- og høgskulesektoren skal sanksjonerast
- at universiteta og høgskulane tek ansvaret dei har for å utvikle norsk fagspråk og setja i verk tiltak for å styrkje norsk språk
- at språklova ogso må gjelde studentsamskipnadane
1.2 Språk i grunnskule og vidaregåande utdanning
Halvparten av nynorskelevane på grunnskulen byter hovudmål når dei begynner på vidaregåande. Mangelfull opplæring, og skriveprogram og læremiddel utan støtte for nynorsk, er frustrerande for elevane.
NMU skal jobbe for:
- å sikre og følgje opp at elevane får den undervisninga dei har krav på
- at alle tenestene Google tilbyr norske skular, er tilgjengelege på nynorsk
- å sikre at den nye opplæringslova vert følgd opp og tydeleg omfattar digitale læremiddel
- at skulebibliotek tek inn meir litteratur på nynorsk, til dømes gjennom Nynorsk kultursentrum si pilotbibliotek-satsing
1.3 Språkmangfald i Noreg
I Noreg har me alltid hatt eit mangfald av språk. I det fleirspråklege samfunnet må alle ha rett til å nytte språket sitt, for det er ein viktig del av identiteten vår. Språk deler oss inn i grupper, men kan ogso gje oss moglegheita til å ta del i nye grupper. Kvart språk har sin eigen måte å sjå røynda på. Eit mangfald av språk gjev oss eit mangfald av perspektiv, og dette mangfaldet er ein styrke for alle i Noreg.
NMU skal:
- at fleire skal få opplæring i samiske språk, kvensk og dei andre minoritetsspråka
- at språka synleggjerast og vert brukte i alle samanhengar, til dømes gjennom stadnamn, offentleg bruk og i media.
- at kvensk blir heva til nivå 3 i minoritetsspråkpakta
- at fleire må få tilbod i teiknspråkopplæring, både som førstespråk og som valfag
- at Oslo skal få offisielt sørsamisk namn
2 ORGANISASJON
For å synleggjera organisasjonen, engasjere medlemmar og fremja politikken vår, har NMU desse satsingsområda:
2.1 Utvikling
NMU skal:
- ha 1000 teljande medlemmar ved utgangen av 2023
- arbeide for å motivere medlemmar til å engasjere seg i organisasjonen
- arbeide for å skapa robuste lokallag og leggje til rette for at lokallag kan skipa til eigne aktivitetar
- skulere tillitsvalde og følgje opp lokallaga
- sørgje for opplæring av nye verv og god erfaringsoverføring i overlappinga til nye lokallagsstyre
- synleggjera organisasjonen gjennom å nytte kommunikasjonsstrategien
2.2 Aktivitet
NMU skal:
- gjera seg synlege for medlemmane ved å skipa til ulike arrangement
- gjera seg synlege i media
- stø opp om og hjelpe til med lokal aktivitet
- arrangere vervekampanje med skulestart
- arrangere innspurtskampanje ved årsskiftet
2.2.1 Tilskipingar
NMU skal:
- skipa til vinterleir
- skipa til sommarleir på Færøyane
- skipa til haustleir
- stø opp om lokallag som ønskjer å arrangere eigne tilskipingar
- tilby skuleringar på arrangementa våre, slik at medlemmar får ny gjev til å arbeide for politikken vår
2.2.2 Annan aktivitet
NMU skal:
- hjelpe elevar og studentar som treng det, med å klaga på brot på språklege rettar
- bleste klageportalane ved skulestart og i eksamenstida i samarbeid med lokallaga
- oppmode andre som arbeider med elev- og studentrettar, til å synleggjera språkrettar i kanalane sine
- klaga på brot på språklege reglar og rettar når me kjem over det
- arbeide for at ungdom lærer meir om den norske språkstoda ved å gjennomføre målferdsøkter
- leggje til rette for at lokallaga kan reise på målferd og lære opp fleire til å halde målferder
- dele ut Dialektprisen til eit godt dialektføredøme for ungdom
- jobbe opp mot dei politiske partia rundt valet og laga ein gaid om standpunktet deira i språkspørsmål
3 UTVAL
Norsk Målungdom har fleire utval med konkrete oppgåver.
- Landsstyret skal setja ned og konkretisere mandat for bladstyret, som har ansvar for å gje ut og skaffe innkommer til Motmæle. Bladstyret skal gje ut minst tre Motmæle i perioden.
- Landsstyret skal setja ned ei nemnd som skal utarbeide programmet «Språk i ein digital kvardag».
- Landsstyret skal setja ned ei nemnd som skal revidere internasjonalt program.